MÚSICAS DE TRADICIÓN GALEGA, IBÉRICA E EUROPEA.
Despois de moitos anos compartindo experiencia docente e colaborando musicalmente en diversos proxectos, estes dous excelentes e singulares músicos deciden poñer en marcha un proxecto ao vivo en formato dúo.

Sen artificios, sen trucos, simplemente demostrando do que son capaces cos seus instrumentos e cun compromiso férreo por amosar a singularidade da música de raíz tanto de Galiza e Castela (territorios dos que son fillos) como tamén dalgún territorio Europeo.

Eles son referentes dos seus respectivos instrumentos: a zanfona e o acordeón diatónico. Dous instrumentos de madeira que irmandan dun xeito moi especial.

No seu repertorio imos atopar principalmente ritmos bailábeis executados con contundencia rítmica e precisión harmónica proporcionando unha experiencia que vai agradar tanto á audiencia que decide bailar como a que quere tan só escoitar.

Dáse a singularidade de que tanto a zanfona coma o acordeón diatónico dispoñen de dúas partes ben diferenciadas, a da melodía e a do acompañamento, por tanto a suma convirte a este dúo nunha sensación de catro instrumentos facendo que o son sexa xeneroso, amplo e moi rico, un concerto único que non vai deixar a ninguén indiferente.